天才一秒记住【异族小说】地址：www.1uzu.com
耐王老爷想想看，阿是倪先生来里枝枝节节呢？阿是耐王老爷自家来哚枝枝节节？”说罢，（目夷）了王莲生半日。
莲生仰着脸，只不做声。洪善卿笑道：“俚哚啥枝枝节节也勿关倪事，倪要去哉。”遂与汤啸庵立起身来。莲生意思要一同去，小红只做不看见，倒是阿金大捺住莲生道：“咦！王老爷，耐阿好去嗄？”阿珠喝阿金大放手，却向莲生道：“王老爷耐要去，去末哉；倪是匆好来屈留耐，就搭耐说一声是哉。昨日夜头我搭阿金大两家头陪倪先生坐来哚床浪，坐仔一夜天勿曾困，今夜头倪要因去哉。倪娘姨哚到底无啥干己，就闯仔点穷祸，也匆关倪事。倪先说仔末，王老爷也怪勿着倪。”几句说得莲生左右为难，不得主意。汤啸庵向莲生道：“倪先去，耐坐歇罢。”莲生乃附耳嘱他去张蕙贞家给个信。啸庵应诺，始与洪善卿偕行。小红却也抬身送了两步，说道：“倒难为仔耐哚，明朝倪也摆个双台谢谢耐哚末哉。”说着，倒自己笑了。莲生也忍不住要笑。
小红转身，伸一个指头向莲生脸上连点几点，道：“耐末……”只说得两字，便缩住了，却“哼”的一声，像是叹气。半晌又道：“耐一干仔来末，阿伯倪欺瞒仔耐嗄？耐算教两个朋友来做帮手，帮仔耐说闲话，阿要气煞人！”莲生自觉羞惭，佯作不睬。阿珠冷笑两声，道：“王老爷倒蛮好，才是朋友哚搭俚出个主意。王老爷末去听仔俚。就张蕙贞搭，勿是朋友同得去，陆里认得嗄？”小红道：“张蕙贞搭倒勿是朋友，俚乃自家去打个野鸡。”阿珠道：“故歇是匆是野鸡哉，也算仔长三哉！叫仔一班小堂名，显焕得来！王老爷做仔几日天，用脱仔几花？阿有千把嗄？”莲生道：“耐哚（要勿）瞎说！”阿珠道：“倒勿是瞎说囗！”随将烟盘收拾干净，道：“王老爷吃烟罢，（要勿）去转啥念头哉！”莲生乃去榻床躺下吸烟。阿珠、阿金大陆续下去。
第十回终。
第十一回 乱撞钟比舍受虚惊 齐举案联襟承厚待
按：沈小红坐在榻床下手，一言不发。莲生自在上手吸烟。房里没有第三个人。
足有一点钟光景，小红又呜呜咽咽的哭起来。莲生摄耳爬腮，无可解劝，也就凭他哭去。无如小红这一哭，直哭得伤心惨民没个收场。莲生没奈何，只得挨上去央告道：“耐哚意思我也蛮明白来里。我末就依仔耐，叨光耐（要勿）哭哉，阿好？耐再要哭，我肚肠要拨来耐哭出来哉。”小红哽噎着嗔道：“（要勿）来搭我瞎说！耐一径骗下来，骗到仔故歇，耐倒还要来骗我！耐定归要拿我性命来骗得去仔了罢哚。”莲生道：“我故歇随便说啥闲话，耐总勿相信，说是我骗耐。难也（要勿）说哉，我明朝就去打一张庄票来搭耐还债，耐说阿好？”小红道：“耐个主意勿差，耐搭我还清仔债末，该搭匆来哉，阿是？故末好去做张蕙贞哉，阿是？耐倒乖来哚！耐勿情愿搭我还末，我也（要勿）耐还哉！”说着，仍别转头去，吞声暗哭。莲生急道：“啥人说去做张蕙贞嗄？”小红道：“耐勿去哉？”莲生道：“勿去哉！”被小红劈面咄了一口，大声道：“耐去骗末哉！耐看来哚，我明朝死来哚张蕙贞搭去。”莲生一时摸不着头脑，呆脸思索，没得回话。
适值阿珠提水铫子上来冲茶，莲生叫住，细细告诉他，问他：“小红是啥意思？”阿珠笑道：“王老爷蛮明白吸，倪末陆里晓得嗄？”莲生道：“耐倒说得好，我为仔勿明白了问耐（口宛）！”阿珠笑道：“王老爷，耐是聪明人，阿有啥勿明白嗄！耐想：倪先生一径搭耐蛮要好，耐为啥勿搭倪先生还债呢？今朝反仔一场，耐倒要搭倪先生还债哉，阿像是耐动气仔了说个闲话？耐为动气了说搭倪先生还债，耐想倪先生阿要耐还嗄？”莲生跳起来跺脚道：“只要俚勿动气末才是哉，例说我动气！”阿珠笑道：“倪先生倒也无啥动气，单为仔王老爷（口宛）。耐想：倪先生阿有第二户客人？耐王老爷再匆来仔，教倪先生那价呢？只要倪先生面浪交代得过，耐就再去做个张蕙贞，也无啥要紧。倪先生欠来哚几花债，早末也要耐王老爷还，晚末也要耐王老爷还，随耐王老爷个便好哉！耐王老爷待倪先生要好勿要好，也勿在乎此。王老爷阿对？”莲生道：“耐也说得勿明白（口宛）。我匆搭俚还债末，生来说我勿好；我就搭俚还仔债，俚原说我勿好。俚到底要我那价末算我要好哉囗？，阿珠笑道：“王老爷也说笑话哉，阿要我来教耐？”说着，提水铫子一路佯笑下楼去了。
莲生一想没奈何，只得打叠起千百样柔情软语去伏侍小红。小红见莲生真个肯去还债，也落得收场，遂趁此渐渐的止住哭声。莲生一块石头方才落地。小红一面拿手帕子拭泪，一面还咕噜道：“耐只怪我动气，耐也替我想想看，比方耐做仔我，阿要动气？”莲生忙陪笑道：“应该动气，应该动气！我做仔耐是一径要动到天亮哚。”说得小红也要笑出来，却勉强忍住道：“厚皮哚来，啥人来理耐嗄。”
本章未完，请点击下一章继续阅读！若浏览器显示没有新章节了，请尝试点击右上角↗️或右下角↘️的菜单，退出阅读模式即可，谢谢！